Press Release


	PRESS RELEASE

	Mahiwasan na giyera kontra droga sa Catanduanes March 18, 2004
	Mahiwasan, agresibo asin kumpletong kampanya kontra sa operasyon nin illegal drugs sa Catanduanes. Ini ang lakdang na planong gibohon ni gubernatorial candidate Joseph C. Cua sa primerong taon kan saiyang termino engkaso siya ang manggana sa maabot na pirilian bilang gobernador.. Ang lakdang katakud sa kagustuhan ni Cua na totalmenteng mapundo ang drug addiction sa probinsiya asin tanganing mapatunayan na daing katotohanan sa mga akusasyon asin kabubuwaan na ipinapaluwas kan saiyang mga kritiko na suboot siya sarong drug lord asin imbuwelto sa distribusyon nin ipinagbabawal na bulong sa islang ini. Ang agresibong giyera kontra droga. Segun sa mayor kan San Andres asin ngonian nangengenotan na kandidato para gobernador kan Catanduanes, saiyang gigibohon nin huli ta segun saiya, daing nanginibohan an presenting gobernador sa bilog na termino kaini sa kapitolyo asin maging kan ini 9 na taon, tanganing mapundo an operasyon nin illegal na droga sa Catanduanes. Katakud kaini, inangat man ni Cua ang saiyang mga kritiko asin kalaban sa politika na magpaluwas nin mga ebidensiya manunungod sa saindang mga akusasyon. Napag-araman na ginagamit kan mga kalaban ni Cua sa politika ang nagkakaperang sector pati na man ang internet, tanganing magbalangibog nin kabubuwaan asin pilit siyang isangkot sa operasyon kan illegal na drugs sa Catanduanes. Sa ibong na lado, nagkakaperang sertipikasyon ang ipinaluwas na kan mga ahensiya nin gobyerno kun saen sinabi kan mga ini na nungkang naging imbuwelto si Cua sa mga siring na iligal na transaksiyon. Napag-araman na kan 1998, nagpaluwas ang PNP provincial office Catanduanes, sa paagi ni dating Provincial Director P/Supt. Ireneo B. Manaois, nin sertipikasyon kun saen sinabi kaini na an ngaran ni Cua dai kabali sa watchlist on drug trafficking. Siring man ang Regional Intelligence and Invetigation Division kan PNP sa Camp Gen. Simeon Ola sa Legazpi City nagpaluwas man kan 1998 nin kaparehong sertipikasyon asin sinabi kaini na si Cua dai ni sarong derogatory record sa saindang opisina. Dagdag pa kaini ang sertipikasyon na ipinaluwas man kan 2001 ni dating PNP Catanduanes Provincial Director P/Supt. Freddie O. Panen kun saen pinatunayan niya na talagang dai kabali si Cua sa watchlist sa drug trafficking. Apwera kan mga nabanggit, and PDEA o Philippine Drug Enforcement Agency piglalaoman na magpaluwas nin pahayag tanganing padagos nang malinig ang pangaran ni Cua en koneksiyon kan illegal drugs trade sa probinsiyang ini. Sa ibong na lado, ang mga sources harane sa gubernatorial candidate nagsabi na ang mga huring-huding asin akusasyon ki Cua posibleng resulta kan saiyang mabilis na pag-asenso sa lado nin negosyo lalo na sa construction asin shipping. Magigirumduman na si Cua iyo ang maysadiri kan mga barkong Star Ferry, Calixta I asin Calixta II na anas nagbibiyahe sa rutang Catanduanes-Tabaco. “Gustong paluwason kan sakuyang mga kalaban na ang mga nasambit na barko sakong nakua hale sa iligal na paagi. Dai ninda aram na ang mga ito sakong nakua sa paagi nin malinig asin legal na transaksiyon,” ang may hinanakit na pahayag ni Cua. Napag-araman na si Cua, dating part owner (minor stockholder) kan Calixta I kan ini pagsadiri pa ni Ambassador Leandro I. Verceles Sr. asin Atty. George Yang. “kan magpaparaiwal na su duwang major stockholders, pig-pressure ako ni Ambassador na bakalon ang sainyang share,” pahayag ni Cua. “Binayadan ko nin cash su parte ni Ambassador Verceles samantalang su share ni Attorney pinabakal sako nin hulugan,” saiya pang dagdag. Sa ibong na lado, ang Star Ferry na may biyaheng Virac-Tabaco-Virac saiyang nakua sa tabang nin sarong loan sa Development Bank of the Philippines (DBP) kan Pebrero 19,1998 na may kantidad na P12 million. “P17 million ang kantidad kan Star Ferry. Su P5 million iyo sakong equity. Nabayadan ko na man su loan ta self-liquidating man su barko,” pahayag ni Cua. Sa padagos na pag-expand ni Mayor Cua sa lado nin shipping, buminakal siya nin saro pang Roll On-Roll Off (Ro-Ro) boat – ang Calixta II. Ini pinag-finance sa paagi man ni saro pang loan sa DBP kan Septiembre 20, 1999 sa kantidad na P8 million. “By October this year, bayad ko na ang Calixta II,” pahayag kan mayor nin San Andres. Mientras na padagos ang pag-asenso kan mga negosyo ni Cua, kasikatan man kan saiyang pinsan na si Joker sa lado nin drug pushing kun saen nadakop pa ngani ini kan mga operatiba nin gobierno kaiba ang saiyang agom. Segun sa mga obserbadores, ang siring na bagay ang puedeng saro sa mga rason kun ngata ang ngaran ni Cua iyo ang pilit na itinatakod sa operasyon nin illegal drugs. “Pero ngata ta pagbasulon ta man si mayor sa salang gibo kan saiyang pinsan? Magkaiba man sinda nin linya asin ugali,” hapot man kan nagkakapera. Katakud kaini, sinabi ni Cua na kung may koneksiyon siya sa illegal drugs, kutana dai na siya naglaog sa pulitika tanganing dai ma-expose ang saiyang sadiri sa kritisismo. Pinagrinaw pa ni Cua na kung drug lord siya, imbis magkandidato, masuporta na sana siya nin kandidato, arog kan gibo kan mga drug lords sa nasyon, tanganing maproteksiyon ang saiyang sadiri asin salang transaksiyon. Segun sa mga sources, hasta sa ngonian dai pa ni sarong ebidensiya na puedeng magpahiling asin magpatunay sa pagkaimbuwelto ni Cua sa illegal drugs trade. Sainda pang idinagdag na limitado man sana ang income sa illegal drugs sa Catanduanes sa dahilan na diit ang customer digdi na iguang kakayahan maggastos nin dakula para sa saindang bisyo. Ang siring na income sa droga, segun pa sa sainda, bakong magkanigo tanganing maging milyonaryo o yumaman ang sisay man na imbuwelto digdi. Segun pa man sa mga sources, kadaklan na drug pushers digdi imbuwelto sa street pushing tanganing masuportaran ang saindang sadiring bisyo. TOP